[Pooya/Ali Commentary 7:130] (see commentary for verse 103)

1. Continual disobedience is a presage to incoming disaster and destruction. 2. By (136) Ahl al-Bayt will inherit the world on Resurrection.

بیدار کرنے والی سزائیں

جیسا کہ اسی سورہ کی آیت ۹۴ میں گزرا ہے کہ ایک کلی قانون تمام پیمبروں کے لئے یہ تھا کہ جب ان کو لوگوں کی مخالفت کا سامنا ہوا اور وہ کسی طرح سے راہ راست پر نہ آئیں تو خدا ان کو بیدار کرنے کے لئے مشکلات ومصائب میں گرفتار کرتا تھا تاکہ وہ اپنے میں نیازمندی اور محتاجی کا احساس کریں ، اور ان کی فطرت توحید جو آرام وآسائش کی وجہ سے غفلت کے پردوں میں چلی گئی ہیں دوبارہ ابھر آئے اور ان کو اپنی ضعف وناتوانی کا اندازہ ہو اور اس قدرو ناتوانا ہستی کی جانب متوجہ ہوں جو ہر نعمت ونقمت کا سرچشمہ ہے ۔ پہلی آیت میں مطلب کی طرف اشارہ فرمایا گیا ہے: ہم نے آل فرعون کو قحط، خشک سالی اور ثمرات کی کمی میں مبتلا کیا کہ شاید متذکر بیدار ہوجائیں (وَلَقَدْ اٴَخَذْنَا آلَ فِرْعَوْنَ بِالسِّنِینَ وَنَقْصٍ مِنَ الثَّمَرَاتِ لَعَلَّھُمْ یَذَّکَّرُونَ ) ۔ ”سنین“ جمع ہے ”سنة“ کی جس کے معنی سال کے ہیں، لیکن عام طور سے جب یہ لفظ ”اخذ“ کے ساتھ آتا ہے تو اس کے معنی قحط سالی کے ہوجاتے ہیں، بنابرین ”اخذ ہ السنة “ (سال نے اس کو پکڑا )کے معنی ہیںکہ وہ خشک سالی میں مبتلا ہوگیا، شاید اس کی وجہ یہ ہے کہ قحط سالی کے سال بہ نسبت دوسرے سالوں کے کم ہیں لہٰذا جب کہا گیا کہ اس کو ساک نے پکڑ لیا اور اس سے عام سال مراد ہو تو یہ کوئی نئی بات نہیں اس لئے اس سے مراد وہ سال ہوں گے جو کم آتے ہیں تاکہ ایک نئی بات سمجھ میں آئے اور وہ خشک سالی کے سال ہیں ۔ لفظ ”آل“ در اصل ”اھل “ تھا پھر اس میں قلب واقع ہوا اور یہ اس حالت میں ہوگیا، اور ”اہل“ کے معنی ہیں”انسان کے قریبی اور خاص آدمی چاہے وہ اس کا قریبی عزیز ہو یا اس کا ہم خیال ہم مسلک واطرافی ہو“۔ باوجود یہ کہ قحط سالی نے فرعونیوں کو گھیر لیا تھا لیکن آیہ مذکورہ بالا میں صرف فرعون کے مخصوصین کا ذکر کیا گیا ہے مقصد یہ ہے کہ اگر یہ بیدار ہوگئے تو سب لوگ بیدار ہوجائیں گے کیوں کہ تمام لوگوں کی نبض انہی کے ہاتھوں میں ہے یہ چاہیں تو بقیہ افراد کو چونکہ ان زمینوں کے مالک اہلی تھے اسی لئے فی الحقیقت وہ سب سے زیادہ اس سے متاثر ہوئے تھے ۔ ضمناً یہ بھی معلوم ہوا کہ یہ خشک سالی کئی سال تک باقی رہی کیوں کہ ”سنین“ جمع کا صیغہ ہے خصوصاً ” نقص من الثمرات“ کا بھی اضافہ ہوا ہے (میووں کی کمی) کیوں کہ خشک سالی اگر وقتی ہو تو درختوں پر اتنا اثر انداز نہیں ہوا کرتی لیکن اگر طولانی ہوجائے تو درختوں کو بھی نابود کردیتی ہے اگرچہ یہ احتمال بھی موجود ہے کہ خشک سالی کے علاوہ کوئی اور آفت بھی درختوں کو آگئی ہو ۔ جملہ ”لعلھم یذکرون“ سے گویا اس بات کی طرف اشارہ مقصود ہے کہ حقیقت توحید کی طرف توجہ ہر انسان کی سرشت میں ابتدا سے پوشیدہ ہے لیکن ہوتا یہ ہے کہ غلط تربیت کی وجہ سے، یا نعمتوں میں مست ہوجانے کے باعث انسان اس کو بھول جاتا ہے، لیکن جب مشکلوں میں پھنستا ہے تو دوبارہ پھر خدا یاد آتا ہے، مادہ ”یذکر“ جس کے معنی یاد آوری کے ہیں اس مفہوم سے مناسبت رکھتا ہے ۔ قابل توجہ یہ ہے کہ آیہ ۹۴ کے ذیل میں جو جملہ ”لعلھم یضرعون“ (شاید وہ خدا کے سامنے خضوع اور فروتنی اختیار کریں) آیاہے، فی الحقیقت پہلا جملہ ”لعلھم یذکرون“ اسی کا مقدمہ ہے کیوں کہ انسان پہلے حالت ”تذکر“ میں آتا ہے، اس کے بعد فروتنی اور سپردگی کی منزل پر فائز ہوتا ہے ۔ لیکن آل فرعون، بجائے اس کے کہ ان الٰہی تنبیہوں سے نصیحت لیتے اور خواب خرگوش سے بیدار ہوتے ، انھوں نے اس سے سوء استفادہ کیا اور حوادث کی من مانی تفسیر کی: ”جب حالات ان کے منشاء کے مطابق ہوتے تھے تو وہ راحت وآرام میں ہوتے تھے اور کہتے کہ یہ حالات ہماری نیکی ولیاقت کی وجہ سے ہیں !“فی الحقیقت ہم اس کے اہل ولائق ہیں ( فَإِذَا جَائَتْھُمَ الْحَسَنَةُ قَالُوا لَنَا ھٰذِہِ) ۔ ”لیکن جس وقت وہ مشکل ومصیبت میں گرفتار ہوتے تھے تو اس کو فوراً موسیٰ (علیه السلام) اور ان کے ساتھیوں کے سر باندھ دیتے تھے“ اور کہتے تھے کہ یہ ان کی بد قدمی کی وجہ سے ہوا ہے ( وَإِنْ تُصِبْھُمْ سَیِّئَةٌ یَطَّیَّرُوا بِمُوسیٰ وَمَنْ مَعَہُ) ۔ ”یطیروا“ مادہٴ”تطیر“ سے ہے جس کے معنی بد فالی کرنے کے ہیں، اس کی اصل کلمہ ”طیر“ (پرندہ) ہے، چونکہ عربوں میں رسم تھی کہ وہ پرندوں کے رسم تھی کہ وہ پروندوں کے ذریعہ فال بد لیا کرتے تھے، کبھی کوے کی آواز کو منحوس جانتے تھے، کبھی کسی پرندے کے چپ سے راست کی طرف اڑنے سے بد فالی لیتے تھے، اس لئے کلمہٴ”تطیر“ ہر بد فالی کے لئے بولا جانے لگا ۔ لیکن قرآن کریم ان کے جواب میں کہتا ہے: ”ان کی بدبختیوں اور تکلیفوں کا سرچشمہ خدا کی طرف سے ہے خدا نے یہ چاہا ہے کہ اس طرح ان کو ان کے اعمال بد کی وجہ سے سزا دے، لیکن ان میں سے اکثر ان کو نہیں جانتے“ ( اٴَلَاإِنَّمَا طَائِرُھُمْ عِنْدَ اللهِ وَلَکِنَّ اٴَکْثَرَھُمْ لَایَعْلَمُونَ) ۔ قابل توجہ بات یہ ہے کہ یہ طرز فکر کوئی فرعونیوں ہی کے ساتھ مخصوص نہ تھا، آج کل کے زمانہ میںبھی خود خواہ اور خود پسند قوموں میں یہ صفت بد دیکھی جاسکتی ہے کہ وہ حقیقتوں کو بدلنے کے لئے اور اپنے وجدان کو یا دوسرے لوگوں کو فریب دینے کے لئے جب بھی ان کو کوئی کامیابی نصیب ہوتی ہے تو وہ اس کو اپنی لیاقت کی طرف منسوب کرتے ہیں چاہے ان کی لیاقت واستعداد کو اس میں ذرہ برابر بھی دخل نہ ہو، اور جس وقت کوئی بدبختی ان کا دامن پکڑتی ہے تو اس کو اپنی مخفی یا آشکار دشمن کی طرف نسبت دیتے ہیں چاہے وہ خود اس کا اصل سبب ہوں، قرآن بیان کرتا ہے کہ دشمنان پیغمبر اسلام بھی ان کے خلاف ایسی ہی باتیں کیا کرتے تھے (سورہ ٴ نساء آیت۷۸) دوسری جگہ قرآن کہتا ہے کہ گمراہ انسانوں کا یہی حال ہے (سورہٴ فصلت آیت ۵۰)اور یہ در حقیقت خود خواہی، ضد اور گرور کا ایک زبردست مظہر ہے (۱) ۱۔ ضمناً یہ بھی معلوم ہونا چاہئے کہ یہاں پر ”حسنہ“ پر تو الف ولام آیا ہے، اور ”سیئة“ پر تنوین آئی ہے اور نکرہ ہے اس سے اس بات کی طرف اشارہ مقصود ہے کہ نعمتیں فراواں ان پر نازل ہوتی تھیں اور تکالیفیں کبھی کبھی آتی تھیں ۔

فال نیک و بد

مختلف قوموں میں فال نیک و بد کا رواج شاید پہلے سے چلا آرہا ہے، لوگ کچھ چیزوں سے ”فال نیک“ لیا کرتے تھے اور ان کو اپنی فتحیابی کی دلیل خیال کرتے تھے اور کچھ چیزوں کو ”فال بد“ سمجھتے تھے اور ان کو اپنی شکست کی دلیل سمجھتے تھے حالانکہ کامیابی یا ناکامی کوان چیزوں سے دور کا لگاؤ بھی نہ تھا خصوصاً فال بد میں تو سراسر خرافاتی پہلو اور حد درجہ کی نامعقولیت تھی اور اب بھی ہے ۔ ان دونوں طرح کی فالوں کا اگرچہ کوئی اثر طبیعی(NATURAL RESULT) حقیقت میں نہیں ہوتا تاکہ بلاشبہ ان کا نفسیاتی اثر مرتب ہوسکتا ہے، فال نیک بالعموم پر امید بناتی ہے اور سرگرم عمل ہونے کا سبب بنتی جب کہ ”فال بد“ ناامیدی ،سستی اور ناتوانی پیدا کرتی ہے ۔ شاید یہی وجہ ہے کہ روایات اسلامی میں فال نیک سے نہیں روکاگیا ہے لیکن ”فال بد“ سے شدت سے منع کیا گیا ہے پیغمبر اکرم صلی الله علیہ وآلہ وسلم کی ایک مشہور حدیث ہے جس میں آپ نے فرمایا: تفاٴلوا بالخیر تجدوہ۔ کاموں میں فال نیک سے کام لیا کرو (اور پُر امید رہو)تاکہ مقصد تک پہنچ جاؤ۔ اس میں اس کا اثباتی پہلو نمایا ہے ، بلکہ خود پیغمبر اسلام صلی ا للهعلیہ وآلہ وسلم اور پیشوایان عالی مقام علیہم السلام کے واقعات میں ہے کہ وہ بعض اوقات مسائل میں فال نیک سے کام لیا کرتے تھے، مثلاً جب مسلمان واقعہ حدیبیہ میں کفار مکہ کے سامنے آئے تو اس میں سہیل بن عمرو کفار کا نمائندہ بن کر پیغمبر اسلام کے پاس آیا اور حضرت سے کسی نے کہا کہ سہل آیا ہے تو آپ نے فوراً فرمایا : ”قد سہل علیکم وامرکم “۔ یعنی اس کانام ”سہل“ س ے میں یہ فال لیتا ہوں کہ تمھارے اوپر یہ کام سہل وآسان ہوجائے گا(1) مشہور تاریخ نویس ”دمیری“ جو آٹھویں صدی کا مورخ ہے وہ بھی اپنی ایک کتاب میں اسی مطلب کی طرف اشارہ کرتے ہوئے لکھتا ہے: پیغمبر اسلام فال نیک کو اس لئے پسند فرماتے تھے کہ انسان جب بھی فضل الٰہی کا امید وار ہوگا تو نیکی کی راہ میں اپنے قدم آگے بڑھائے گا اور جب اس سے اپنی امید کو توڑ لے گا تو شر سے راستے پر چل پڑے گا فال بد لینا سبب ہے سوء ظن ، انتظار بلا اور امید بد بختی کا (2) ۔ بہرحال ان وجوہ کی بنا پر ”فال بد“ جس کو عرب ”تطیر“ اور ”طیرہ“ کہتے تھے، جیسا کہ سابقا اشارہ ہوا ہے روایات اسلامی میں ان کی شدید مذمت کی گئی ہے ، قرآن مجید میں بھی بہ تکرار اس مطلب کا ذکر آیا ہے اور اس کی مذمت کی گئی ہے (3)، ایک حدیث پیغمبر اسلام کی یہ ہے، آپ نے فرمایا: ”الطیرة شرک “ فال بد نکالنا (اور اس کو انسانی تقدیر میں موثر جاننا)ایک طرح کا شرک ہے ۔(4) یہ بھی ہے کہ اگر فال بد کا برا اثر مرتب ہو بھی تو یہ اسی نفسیاتی کشمکش کا نتیجہ ہے جو فال لیتے وقت پیدا ہوئی ہے، امام جعفر صادق علیہ السلام فرماتے ہیں: ”الطیرة علی ما تجعلھا ان ھونتھا تھونت، وان شددتھا تشددت، وان لم تجلعلھا شیئا لم تکن شیئا“۔ فال بد کا اثر اسی قدر ہے جتنا تم قبول کرو، اگر اس کو سبک سمجھو تو اس کا اثر بھی سبک وآسان ہوگا اور اگر اس کو سخت سمجھو تو نتیجہ بھی سخت نکلے گا اور اگر اس کی طرف اعتنا نہ کرو اور اس کی پروا نہ کرو تو اس کا کوئی اثر برآمد نہ ہوگا ۔(5) اسلامی روایات میں رسول اللہ صلی ا للهعلیہ وآلہ وسلم سے نقل ہوا ہے کہ آپ نے فرمایا: ”فال بد“ سے مقابلے کا طریقہ یہ ہے کہ اس کی پروا نہ کی جائے ۔ نیز آنحضرت صلی ا للهعلیہ وآلہ وسلم سے منقول ہے کہ فرمایا: ”ثلات لا یسلم منھا احد، الطیرة، والحسد، والظن، قیل فما نصنع؟ قال: اذا تطیرت فامض، واذا حسدت فلاتبغ، واذا ظننت فلاتحقق“۔ تین چیزیں ایسی ہیں کہ ان سے کوئی شخص محفوظ نہیں ہے (ان تین چیزوں کی وجہ سے عام لوگوں کے دلوں میں وسوسہ پیدا ہوجاتا ہے) فال بد، حسد اور بدگمانی، لوگوں نے پوچھا تو پھر ہم کیا کریں؟ فرمایا: جب فال بد کا سامنا ہو تو اس کی پروا نہ کرو اور اپنا کام کر گزرو، اور جب دل میں حسد پیدا ہوتو اس کو عملی طور سے بجالاؤ اور جب کسی سے بدگمانی ہو تو تحقیق نہ کرو ۔ عجیب بات یہ ہے کہ فال بد اور فال نیک کا رواج ترقی یافتہ اور صنعتی ملکوں میں بھی پایا جاتا ہے اور مشہور ومعروف تاریخی شخصیتوں میں بھی یہ عادت موجود تھی اور ہے، جیسے مغربی ممالک میں ان چیزوں سے فال بد لی جاتی ہے :کسی سیڑھی کے نیچے سے گزرنا، نمکدان گرجانا، چاقو کا ہدیہ دینا ۔ البتہ فال نیک کا مسئلہ کوئی اتنا اہم مسئلہ نہیں ہے کیوں کہ جیسا کہ ہم کہا اکثر اس کا اثر مثبت نکلتا ہے لیکن فال بد کے رسم ورواج سے ہمیشہ مقابلہ کرنا چاہئے اور اس بری رسم کو لوگوں کے ذہنوں سے خارج کرنا چاہئے، اس مقابلے کا بہترین طریقہ یہ ہے کہ روح ایمانی کی تقویت کی جائے، دلوں میں خدا پر توکل و اعتماد کیا جائے، یہی رویات اسلامی میں بھی وارد ہوا ہے ۔ ۱۳۲ وَقَالُوا مَھْمَا تَاٴْتِنَا بِہِ مِنْ آیَةٍ لِتَسْحَرَنَا بِھَا فَمَا نَحْنُ لَکَ بِمُؤْمِنِینَ۔ ۱۳۳فَاٴَرْسَلْنَا عَلَیْھِمْ الطُّوفَانَ وَالْجَرَادَ وَالْقُمَّلَ وَالضَّفَادِعَ وَالدَّمَ آیَاتٍ مُفَصَّلَاتٍ فَاسْتَکْبَرُوا وَکَانُوا قَوْمًا مُجْرِمِینَ ۔ ترجمہ ۱۳۲۔اور انھوں نے کہا کہ(اے موسیٰ) جب تم کوئی ایسی آیت ہمارے پاس لاؤ کہ اس سے تم ہم پر جادو کردو ہم پھر بھی تم پر ایمان نہیں لائیں گے ۔ ۱۳۳۔پس ہم نے ان پر ( لگاتاربلائیں نازل کیں )طوفان، ٹڈیاں، زراعتی آفت مینڈک اور خون جو الگ الگ نشانیاں تھیں ، بھیجیں (لیکن وہ پھر بھی بیدار نہ ہوئے )اور انھوں نے تکبر کیا اور وہ گنہگار لوگ تھے ۔ 1۔ المیزان، جلد۱۹،صفحہ ۸۶- 2۔سفینة البحار،جلد۲، صفحہ ۱۰۲- 3۔جیسے سورہٴ یٰسین آیت ۱۹، سورہٴ نحل آیت ۴۷، سورہٴ اعراف آیت مورد بحث- 4۔المیزان در ذیل آیہ مورد بحث- 5۔المیزان در ذیل آیت مورد بحث-