1. The pious shall attain salvation, with removal of fraternal jealousy. 2. Do not ever dismay in Divine Mercy but for Divine Enmity.

[Pooya/Ali Commentary 15:51] Refer to the commentary of Araf: 80 to 84 and Hud: 69 to 83 for the events pertaining to prophet Lut.

سوره حجر / آیه 51 - 60

۵۱۔ وَنَبِّئْھُمْ عَنْ ضَیْفِ إِبْرَاھِیمَ۔ ۵۲۔ إِذْ دَخَلُوا عَلَیْہِ فَقَالُوا سَلَامًا قَالَ إِنَّا مِنْکُمْ وَجِلُونَ ۔ ۵۳۔ قَالُوا لاَتَوْجَلْ إِنَّا نُبَشِّرُکَ بِغُلَامٍ عَلِیمٍ۔ ۵۴۔ قَالَ اٴَبَشَّرْتُمُونِی عَلَی اٴَنْ مَسَّنِی الْکِبَرُ فَبِمَ تُبَشِّرُونَ۔ ۵۵۔ قَالُوا بَشَّرْنَاکَ بِالْحَقِّ فَلاَتَکُنْ مِنْ الْقَانِطِینَ۔ ۵۶۔ قَالَ وَمَنْ یَقْنَطُ مِنْ رَحْمَةِ رَبِّہِ إِلاَّ الضَّالُّون۔ ۵۷۔ قَالَ فَمَا خَطْبُکُمْ اٴَیُّھَا الْمُرْسَلُونَ ۔ ۵۸۔ قَالُوا إِنَّا اٴُرْسِلْنَا إِلَی قَوْمٍ مُجْرِمِینَ ۔ ۵۹۔ إِلاَّ آلَ لُوطٍ إِنَّا لَمُنَجُّوھُمْ اٴَجْمَعِینَ ۔ ۶۰۔ إِلاَّ امْرَاٴَتَہُ قَدَّرْنَا إِنَّھَا لَمِنْ الْغَابِرِینَ ۔] ترجمه ۵۱۔اور انھیں (میرے بندوں کو)ابراہیم کے مہمانوں کی خبر دے ۔ ۵۲۔جس وقت وہ اس کے پاس پہنچے اور سلام کیا ( تو ابراہیم نے ) کہا : ہم تم سے خوفزدہ ہیں ۔ ۵۳۔انھوں نے کہا: ڈرو نہیں ،ہم تجھے ایک دانا اور عالم بیٹے کی بشارت دیتے ہیں ۔ ۵۴۔انھوںنے کہا: کیامجھے بشارت دیتے حالانکہ میں بوڑھا ہوگیا ہوں (توپھر)توپھر کس چیزکی بشارت دیتے ہو ۔ ۵۵۔انھوں نے کہا : ہم سچی بشارت دیتے ہیں ، مایوس لوگوں میں سے نہ ہو ۔ ۵۶۔اپنے پر وردگار کی رحمت سے گمراہوں کے علاوہ کون مایوس ہوتا ہے ۔ ۵۷۔(پھر اس نے )کہا : اے فرستادگان الہٰی ! تم کس کام کے لئے مامور کیے گئے ہو ۔ ۵۸۔وہ کہنے:ہماری ذمہ دار ی گنہ گار قوم سے ہے کہ انھیں ہلاک کریں ۔ ۵۹۔سوالئے خاندان لوط کے کہ ان سب کو بچا لیں گے ۔ ۶۰۔البتہ اس کی بیوی کو ہم نے طے کیا ہے کہ وہ ( شہر میں ) پیچھے رہ جانے والوں (اور ہلاک ہونے والوں) میں سے ہو ۔

انجانے مہمان

انجانے مہمان ان آیات میں اور ان سے پہلی والی کچھ آیات میں عظیم انبیاء اور ان کے سر کش امتوں کی تاریخ کا ایک تربیتی حصہ ہے اس میں خدا کے مخلص بندوں اور شیطان کے پیروکاروں کی زندگی کے واضح نمونے ہیں ۔ یہ امر جاذب نظر ہے کہ بات حضرت ابراہیم علیہ السلام کے مہمانوں کے واقعہ سے شروع کی گئی ہے (وہی فرشتے کہ جو آپ کے پاس انسانی لباس میں آئے تھے پہلے انھوں نے آپ کو ایک ذی وقار بیٹے کی بشارت دی اور پھر قوم لوط کے دردناک انجام کی خبر دی) ۔ قبل کی دو آیتوں میں پیغمبر ِ اسلام کو حکم دیا کہ بندوں کو مقام رحمت خدا کے بارے میں بھی بتائیں اور اس کے درردناک عذاب کے بھی ۔ اب حضرت ابراہیم کے مہمانوں کے واقعے میں ان مذکورہ دو صفحات کے دو زندہ نمونے دکھائی دیتے ہیں اس طرح گذشتہ آیات اور ان آیا ت کے درمیان ربط واضح ہوجاتا ہے ۔ پہلے ارشادفرمایا گیا ہے : میرے بندوں کو ابرہیم (علیہ السلام) کے بارے میں خبر دو ( وَنَبِّئْھُمْ عَنْ ضَیْفِ إِبْرَاھِیمَ) ۔ اگر چہ ”ضیف“ یہاں مفرد کی صورت میں آیا ہے لیکن جیسا کہ بعض عظیم مفسرین نے کہا ہے ”ضیف“ مفرد اور جمع دونوں کے معنی رکھتا ہے (ایک مہمان اور کئی مہمان ) ۔ یہ بن بلائے مہمان وہی فرشتے تھے جنہوں نے ” ابراہیم کے پاس پہنچ کر پہلے انجانے طور پر اسے سلام کیا “( إِذْ دَخَلُوا عَلَیْہِ فَقَالُوا سَلَامًا ) ۔ جیسا کہ ایک بزرگ میزبان کا فریضہ ہے ، ابراہیم نے ان کی پذیرائی کا اہتمام کیا فوراً ان کے لئے مناسب غذا فراہم کی لیکن جب دسترخوان بچھایا گیا تو انجانے مہمانوں نے غذا کی طرف ہاتھ نہ بڑھا یا ۔تو حضرت ابراہیم (علیہ السلام) کو اس پر وحشت ہوئی ۔ انھوں نے اپنی پریشانی چھپائی نہیں ۔ صراحت سے ان سے کہا : ہم تم سے خوف زدہ ہیں “(قَالَ إِنَّا مِنْکُمْ وَجِلُونَ ) ۔۱ یہ خوف اس رواج کی بناء پر تھا کہ اس زمانے میں اور بعد میں بھی بلکہ ہمارے زمانے تک بعض قوموں کا معمول ہے کہ جب کوئی شخص کسی نان و نمک کھالیتا ہے تو اسے ضرر نہیں پہنچتا اور اپنے آپ کو اس ممنون ِ احسان سمجھتا ہے لہٰذا کھانے کی طرف ہاتھ نہ بڑھانے کو برا سمجھتا ہے اور اسے کینہ و عدات کی دلیل شمار کیا جاتا ہے ۔ لیکن زیادہ دیر نہ گذری تھی کہ فرشتوں نے حضرت ابراہیم علیہ السلام کی پریشانی سے نکال دیا اور ” اس سے کہا : ڈرو نہیں ہم تجھے ایک عالم و دانا بیٹے کی بشارت دیتے ہیں “۔(قَالُوا لاَتَوْجَلْ إِنَّا نُبَشِّرُکَ بِغُلَامٍ عَلِیمٍ) ۔ یہ کہ غلام علیم ( صاحب علم لڑکے )سے کون مراد ہے ، قرآن کی دیگر آیات کو سامنے رکھتے ہوئے واضح ہو جاتا ہے کہ اس سے مراد اسحاق ہیں کیونکہ فرشتوں نے جب حضرت ابراہیم (علیہ السلام) کو یہ بشارت دی تو ان کی بیوی سارہ جو ظاہراً ایک بانجھ عورت تھی انھوں نے اسے بھی یہ بشارت دی جیسا کہ سورہ ٴ ہود کی آیہ ۷۱ میں ہے ۔ وامراٴتہ قائمة فضحکت فبشرناھا باسحاق اس کی بیوی کھڑی تھی ، وہ ہنسی اور ہم نے اسے اسحاق کی بشارت دی ۔ ہم یہ بھی جانتے ہیں کہ سارہ حضرت اسحاق کی والدہ تھیں ۔ قبل ایں حضرت ابراہیم حضرت ہاجرہ سے صاحب ِاولاد تھے ۔ حضرت اسماعیل ان کے فرزند تھے (حضرت ہاجرہ وہ کنیز تھیں جنھیں حضرت ابراہیم نے زوجیت کے لئے انتخاب کیا تھا )لیکن حضرت اسماعیل اچھی طرح جانتے تھے کہ طبیعی اصولوں کے لحاظ سے ان سے ایسے بیٹے کی پیدا ئش بہت بعید ہے اگر چہ خدا کی قدرت کاملہ کے لئے کوئی چیز محال نہیں ہے مگر انھوں نے معمول کے طبیعی قوانین کی طرف توجہ نے ان کے تعجب کو ابھاررا لہٰذا انھوں نے کہا مجھے ایسی بشارت دیتے ہوحالانکہ میں بڑھاپے کی عمر کو پہنچ گیا ہوں ۔ ( قَالَ اٴَبَشَّرْتُمُونِی عَلَی اٴَنْ مَسَّنِی الْکِبَرُ) ۔واقعاً کس چیز کی بشارت دیتے رہے ہو ( فَبِمَ تُبَشِّرُونَ) ۔ کیا تمہاری یہ بشارت حکمِ الہٰی سے ہے یا خود تمہاری طرف سے ہے صراحت سے کہو تاکہ مجھے زیادہ اطمینان ہو ۔ ” مسنی الکبر“ ( مجھے بڑھاپے نے مس کیا ہے )یہ اس طرف اشارہ ہے کہ بڑھاپے کے آثار میرے سفید بالوں اور چہرے کی جھریوں سے نمایاں ہیں اور اس کے آثار میں اپنے سارے وجود میں محسوس کرتا ہوں ۔ ممکن ہے کہ کہا جائے کہ اس لحاظ سے ابراہیم ایک اچھے تجربے سے گذرے تھے کہ بڑھاپے میں ہی ان کے بیٹے اسماعیل پید ا ہوئے تھے لہٰذا نئے بیٹے یعنی حضرت اسحاق کی پیدا ئش کی بارے میں انھیں تعجب نہیں کرنا چاہئیے تھا لیکن معلوم ہو ناچاہیئے ، کہ بعض مفسرین کے بقول حضرت اسماعیل اور حضرت اسحاق کی پیدا ئش میں دس سال سے زیادہ فاصلہ تھا لہٰذا بڑھاپے میں دس سال گذرجائیں تو بچے کی پیدا کا احتمال بہت کم ہوتا ہے ۔ ثانیاً اگر کوئی واقعہ خلاف معمول ہو اگر چہ استثنائی طور پر ہو ۔ اس سے مشابہ مواقع پر تعجب کرنے سے مانع نہیں ہے کیونکہ ایسے سن و سال میں بچے کی پیدائش بہر حال ایک امر عجیب ہے ۔2 بہر حال فرشتوں نے حضرت ابراہیم کو تردد یا زیادہ تعجب کا موقع نہ دیا ۔ اور ان سے صراحت و قاطعیت سے کہا ہم تجھے حق کے ساتھ بشارت دے رہے ہیں (قَالُوا بَشَّرْنَاکَ بِالْحَقّ) ۔وہ بشارت کہ جو خدا کی طرف سے ہے اور اس کے حکم سے ہے ۔ اسی بناء پر یہ حق ہے او ر مسلم ہے ۔ اس کے بعد اس لئے کہ مبادا ابراہیم مایوس و ناامید ہوں تاکید کے طورپر کہنے لگے : اب جبکہ ایسا ہے تو مایوس ہونے والوں میں سے نہ ہو ( فَلاَتَکُنْ مِنْ الْقَانِطِینَ) ۔ لیکن ابراہیم (علیہ السلام) نے فوراً ان کے اس خیال کو دور کردیا کہ ان پر مایوسی اور رحمت ِ خدا سے ناامیدی کا غلبہ نہیں ہے اور واضح کیا کہ یہ تو صرف طبیعی معمولات کے حوالے سے تعجب ہے ، لہٰذاا صراحت سے کہا : گمراہوں کے سوا اپنے پر وردگار کی رحمت سے کون مایوس ہو گا ( قَالَ وَمَنْ یَقْنَطُ مِنْ رَحْمَةِ رَبِّہِ إِلاَّ الضَّالُّون) ۔ وہی گمراہ کہ جنہوں نے خدا کو اچھی طرح نہیں پہچانا اور اس کی بے پایاں قدرت پر ان کی نگاہ نہیں کی ۔ وہ خدا کہ جو مشت خاک سے ایسا عجیب و غریب انسان پیدا کرتا ہے اور ناچیز نطفہ سے ایک بچہ وجود میں لاتا ہے خرما کا خشک درخت جس کے حکم سے پھل سے لدجاتا ہے اور جلانے والی آگ جس کے حکم سے گلزار ہو جاتی ہے کون شخص ایسے پر وردگار کی قدرت میں شک کرے یا اس کی رحمت سے مایوس ہو ۔ بہر حال یہ بشا رت سننے کے ابراہیم (علیہ السلام) اس خیال میں پڑ گئے کہ ان خاص حالات میں یہ فرشتے انھیں صرف بیٹے کی بشارت دینے نہیں آئے ، یقینا یہ کسی نہایت اہم کام پر مامور ہیں اور یہ بشارت تو ان کی ماموریت کا ایک پہلو ہے لہٰذا ان سے پوچھنے لگے : اے فرستادگان الٰہی ! بتاوٴ کہ تم کس اہم ذمہ داری کے لئے بھیجے گئے ہو؟( قَالَ فَمَا خَطْبُکُمْ اٴَیُّھَا الْمُرْسَلُونَ ) ۔ انھوں نے کہا: ہم ایک گنہ گار قوم کے لئے بھیجے گئے ہیں ( قَالُوا إِنَّا اٴُرْسِلْنَا إِلَی قَوْمٍ مُجْرِمِینَ ) ۔ چونکہ وہ جانتے تھے کہ حضرت ابراہیم (علیہ السلام) جستجو اور تحقیق کے بارے میں اپنی خو کی وجہ سے وہ بھی خصوصاً ایسے مسائل میں اتنے جواب پر بس نہیں کریں گے ۔ لہٰذا انھوں نے فوراً مزید فرمایا : یہ مجرم قوم لوط کے سوا کوئی اور نہیں ہے ہم مامور ہیں کہ اس بے شرم آلودہ قوم کو نیست و نابود کردیں، سوائے خاندان لوط کے کہ جسے ہلاکت سے بچا لیں گے ( إِلاَّ آلَ لُوطٍ إِنَّا لَمُنَجُّوھُمْ اٴَجْمَعِینَ ) ۔ لیکن ”اجمعین“ کی تاکید کے ساتھ ”آل لوط“ کی تعبیر تمام گھر والوں کے بارے میں تھی یہاں تک کہ ان کی بیوی کہ جو مشرکین کی ہم کار تھی اور شاید ابراہیم (علیہ السلام) بھی اس ماجرے سے آگاہ تھے لہٰذا انھوں نے بلافاصلہ استثناء کرتے ہوئے کہا : سوائے اسکی بیوی کے کہ ہم نے طے کیا ہے کہ وہ شہر میں رہ جانے والوں کے ساتھ فنا سے دو چار ہو گی اور نجات حاصل نہ کر سکے گی ۔ ( إِلاَّ امْرَاٴَتَہُ قَدَّرْنَا إِنَّھَا لَمِنْ الْغَابِرِینَ ) ۔ ”قدرنا“ اور ہم نے مقدر کیا)، یہ تعبیر اس طرف اشارہ ہے کہ ہم اس سلسلے میں خدا کی طرف سے ماموریت رکھتے ہیں ۔ فرشتوں کا حضرت ابراہیم (علیہ السلام)کا ملاقات کرنا انھیں ولادت اسحاق کی خوشخبری دینا اور اس طرح اس قوم لوط کے بارے میں گفتگو کرنا ان سب امور پر ہم سورہ ہود کی آیات ۶۹تا ۷۶ کے ذیل میں تفصیل سے بحث کر چکے ہیں ۔3 ۱۔اگر چہ مندر بالاآیات میں اس بات کی طرف اشارہ نہیں کہ حضرت ابراہیم (علیہ السلام) نے پذیرائی کی اور مہمانوں نے کھانے کی طرف ہاتھ بڑھایالیکن جیسا کہ سورہ ہود کی آیہ ۶۹ اور ۷۰ میں ہم پڑھ چکے ہیں یہی تھا ( تفسیر نمونہ جلد ۹ میں مذکورہ آیات کی تفسیر ملاحظہ کیجئے ) 2۔بعض مفسرین نے کہا ہے کہ پہلے بیٹے اسماعیل کی پیدائش کے وقت حضرت ابراہیم علیہ السلام کی عمر ۹۹ سال تھی اور اسحاق کی ولادت کے وقت ۱۱۲ سال تھے۔س 3۔تفسیر نمونہ جلد نہم میں ملاحظہ فرمائیے ۔